شیخ عبدالوحید پی وی ایم اے کے چیئرمین منتخب

اسلام آباد معروف کاروباری شخصیت شیخ عبدالوحید کو سال 2020-21 کے لئے پاکستان وناسپتی مینو فیکچررز ایسوسی ایشن(پی وی ایم اے) کا چئیرمین منتخب کر لیا گیا ہے۔اس بات کا اعلان گزشتہ روز ایک مقامی ہوٹل میں منعقدہ سالانہ اجلاس عام میں کیا گیاجس کے مطابق شیخ عبدالوحیدکو چئیرمین ، رضا ابراہیم کو سینئیر وائس چئیرمین اوررفیع اللہ کو وائس چئیرمین منتخب کر لیا گیا ہے۔ ایگزیکٹو کمیٹی میںطارق اللہ صوفی، عابد علی ملک، شیخ عاطف رشید، فیاض ظفر،احمد غلام حسین، شیخ کاشف رزاق، عمر ریحان، شیخ خالد اسلام اور حاجی محمد اخترکو منتخب کر لیا گیا ہے۔اس موقع پر پی وی ایم اے کے ممبران نے نو منتخب چئیرمین اور دیگر عہدیداروں کو مبارکباد دی اور امید ظاہر کی کہ وہ اس صنعت کے مسائل حل کرنے اور اسکے فروغ میں بھرپور کردار ادا کریں گے۔ اس موقع پر اپنے خطاب میں شیخ عبدالوحید نے کہا کہ وہ اپنے انتخاب پر تمام ساتھیوں کے شکر گزار ہیں اور وہ انکی توقعات پر پورا ترنے کی بھرپور کوشش کریں گے۔انھوں نے کہا کہ پاکستان میں گھی اور کوکنگ آئل کی سالانہ پیداوار پینتالیس لاکھ ٹن ہے جس کی مالیت تقریباً نو سو ارب روپے بنتی ہے اور اس سیکٹر کا شمار چوٹی کے پانچ ریونیو ادا کرنے والے شعبوں میں ہوتا ہے۔انھوں نے کہا کہ خوردنی تیل اور بیچ کی درامد پر سالانہ چار ارب ڈالر خرچ کئے جا رہے ہیں جسے کم کرنے کے لئے ملک میں اسکی پیداوار بڑھانے کی ضرورت ہے جس میں حکومت سے ہر ممکن تعاون کیا جائے گا ۔ انھوں نے صنعت کو درپیش مسائل پر روشنی ڈالی اور کہا کہ حکومت سے مل کر معاملات حل کروانے کی کوشش کریں گے ۔ شیخ عبدالوحید اسے سے قبل تین بار پی وی ایم اے کے چئیرمین اور گزشتہ برس ایف پی سی سی آئی کے نائب صدر بھی رہ چکے ہیں۔